Resensies & Artikels

Martin Rossouw
Die Volksblad - November 2006

Voor op dié album is ’n silhoeët van ddisselblom se blom met die skaam-mooi glimlag. Die hele storie blyk redelik ongekompliseerd te wees.

Die titel sê alles wat dit hoef te sê, dit sê bloot Lienka. Want teen die tyd weet ons al dat Lienka Coetzee eerder met haar sang die praatwerk doen; en van dié solodebuut se eerste snit is my reeds goeie verwagtinge moeiteloos oortref.

Die tweetalige album, as ’n geheel, is ’n strelend-melodieuse exposé wat gebou is rondom Lienka se welbekende gawes as sanger. Uit die aard van die saak het die album ’n oorwegende rustigheid en selfs erns. Dank die hemele daarvoor. ’n Kunstenaar moet mos voortgaan met dit wat sy goed kan doen. Jy ervaar inderdaad ’n stuk opregtheid.

Die voortreflike musikale vakmanskap van hierdie werk verdien ook ’n kompliment. Tesame met gehalte-musici, is dit Floors Oosthuizen se raakvat-verwerkings en produksie wat alles netjies bymekaar hou.

Die manier waarop elke lied aangepak word, is werklik in die kol. Lienka het heel duidelik haarself ook met bekwame liedjieskrywers omring. Dit is veral manlief (en mede-ddisselblommer, Jaco Spies) se naam wat ’n paar keer in die CD-omslag opduik.

Hierdie is nie die soort versameling waarvan jy liedjies wil uitsonder nie, maar snitte soos Wag-’n-bietjiebos, Pad na jou hart, Net ’n droom en Binnekant gee my so ’n ekstra warm gevoel in die bors. Na my mening is Lienka net nog soveel beter wanneer die moedertaal van haar tong afrol.

Oor een ding is ek beslis aangenaam verras: Hier is meer as genoeg vir Generasie X om hulself in te verlustig. Ligte pop se Moses! Met tye herinner Lienka se sang aan Reana Nel (Nianell se rocker-jongsus) en soms selfs aan dié van Evanescence (luister gerus na Outside).

Daar is ook ’n kragtige duet met Ross Learmonth, die voorsanger van die SA rockgroep Prime Circle. Maar nie vir een oomblik voel jy dat sy haar siel verkoop vir markwaarde nie. Inteendeel, ons sien meer van Lienka se siel as ooit tevore.  En ek het geen twyfel dat hierdie sielvolle stem nou, as solokunstenaar, tot haar ware, volle reg kom.